அழகான பூந்தோட்டங்களின் ஊடே
கை கோர்த்தபடி
மகிழ்ச்சியாக
சுற்றித் திரிகின்றோம் நாம்..
பூக்களை நுகர்ந்தபடி
சிரித்து சிரித்து
என்னவோ
பேசிக்கொண்டேயிருக்கின்றாய் நீ...
தலையசைத்தபடியே உன் முகத்தை
பார்த்துகொண்டு நடக்கின்றேன் நான்..
ஏதோவொரு பாடலை
முணுமுணுக்கிறாய் நீ..
உலகின் மிக
இனிமையான பாடலாக
அது இருந்திருக்கவேண்டும்
என்பதுபோல்
ரசிக்கத் தொடங்குகிறேன் நான்...
வசந்த காலத்தின் வாசம்
நம்மைச் சுற்றிலும்...
பின்பு கடற்கரை
மணல்வெளியில்
கால்தடம் பதிக்கத் தொடங்கிறோம்.
நம்மை பிடிக்க முயன்ற
அலைகளோடு விளையாடி நகர்கிறோம்..
திடீரென்று கையை உதறிவிட்டு..
முடிவில்லா கடலின் நடுவே
ஓட ஆரம்பித்தாய் நீ...
என்னென்னவோ
அழுது அரற்றியபடி
பின் தொடர்ந்து
ஓடிவருகின்றேன் நான்...
ஓடி ஓடி..
சிறு புள்ளியாய்.. ஒளிக்கீற்றாய்..
தேய்ந்து மறைந்தாய் நீ..!!
அழுது சோர்ந்த
கண்களோடு..
அயர்ச்சியில்
விழித்தெழுகின்றேன் நான்...!!
கனவுகளின்
மிச்சமாய் எச்சமாய்
சிதறிக்கிடந்த உன் நினைவுகளை
அசைபோட்டபடி...
கருத்துகள் இல்லை :
கருத்துரையிடுக